Wycliffe Bible (1389)
Audio (lines
11-21)
12 And the 3ongere seide to the fadir, Fadir, 3yue to me the porcioun of substaunce, that byfallith to me. And the fadir departide to him the substaunce.
13 And not aftir manye dayes, alle thingis gederid to gidre, the 3ongere sone wente in pilgrymage in to a fer cuntree; and there he wastide his substaunce in lyuynge leccherously.
14 And aftir that he hadde endid alle thingis, a strong hungir was maad in that cuntree, and he bigan to haue nede.
15 And he wente, and cleuyde to oon of the citeseyns of that cuntree. And he sente him in to his toun, that he schulde feede hoggis.
16 And he coueitide to fille his wombe of the coddis whiche the hoggis eeten, and no man 3af to him.
17 Sothli he turned a3en in to him silf, seyde, Hou many hirid men in my fadir hous, han plente of looues; forsothe I perische here thur3 hungir.
18 I schal ryse, and I schal go to my fadir, and I schal seie to him, Fadir, I haue synned a3ens heuene, and bifore thee;
19 Now I am not worthi to be clepid thi sone, make me as oon of thi hyrid men.
20 And he rysinge cam to his fadir. Sothli whanne he was 3it fer, his fadir sy3 him, and he was stirid by mercy. And he rennynge to, felde on his necke, and kiste him.
21 And the sone seyde to him, Fadir, I haue synned a3ens heuene, and bifore thee ; and now I am not worthi to be clepid thi sone.
22 Forsoth
the fadir seyde to his seruauntis, Soone bringe 3e forth the firste stoole,
and clothe 3e him, and 3yue 3e a ring in his hond, and schoon in to the
feet;
23 And brynge 3e a calf maad fat, and sle 3e, and ete we, and plenteuously
ete we.
24 For this my sone was deed, and hath lyued a3en ; he perischide, and
is founden. And alle bigunnen to eat plenteuously.
25 Forsoth his eldere sone was in the feeld; and whanne he cam, and nei3ede
to the hous, he herde a symphonye and a crowde.
26 And he clepide oon of the seruauntis, and axide, what thingis thes
weren.
27 And he seide to him, Thi brodir is comen, and thi fadir hath slayn
a fat calf, for he receyuede him saf.
28 Forsoth he was wroth, and wolde not entre. Therfore his fadir gon out,
bigan to preie him.
29 And he answeringe to his fadir, seide, Lo! so manye 3eeris I serue
to thee, and I brak neuere thi comaundement; thou hast neuere 3ouun a
kyde to me, that I schulde ete largely with my frendis.
30 But aftir that this thi sone, which deuouride his substaunce with hooris,
cam, thou hast slayn to him a fat calf.
31 And he seide to him, Sone, thou ert euere with me, and alle myne thingis
ben thyne.
32 Forsothe it bihofte to ete plenteuously, and for to ioye ; for this
thi brother was deed, and lyuede a3eyn ; he peryschide, and he is founden.
